قصة حياة الاقتصاد: من القمة إلى القاع
: استثمر ف أيه امتى
الفترة اللي فاتت سمعنا كتير جملة "البنك المركزي ماشي بسياسة توسعية" ، وده مصطلح اقتصادي بسيط بس مهم جدًا نفهمه، وخليني أشرحه لك بأسلوب سهل ومن الحياة اليومية
السياسة التوسعية هي بالضبط زي "العلاج" يعني الحكومة بتحاول تزود النشاط الاقتصادي بعلاج هنفهمهولك بعد منشخص المريض
تخيل إن الاقتصاد شخص فطبيعي بيمر بمراحل حياة مختلفة، أوقات يكون في عز صحته، وأوقات يضعف ويتعب، وبعدين يرجع يقف على رجليه من تاني. القصة دي بتحكي عن 4 مراحل بيمر بيهم الاقتصاد دايمًا، وهنشوف
مع كل مرحلة إزاي المفروض تتصرف كمستثمر ذكي
عندنا أربع مراحل رئيسية في أي دورة اقتصادية
التوسع (Expansion)
القمة (Peak)
الانكماش أو الركود (Contraction / Recession)
القاع (Trough)
وده بيحصل بناءً على التغيرات في الناتج المحلي الأجمالى الحقيقي
(Real GDP) يعني ايه " الناتج االمحلى الحقيقي الأجمالي " و ازاي المراحل دي كلها مربوطة بي ؟
بكل بساطة الناتج المحلى الأجمالي الحقيقي هو مؤشر "غنى" الدول، زي ما الثروة مؤشر غنى الأفراد. و هو بيعبر عن سعر كل المنتجات النهائيه و الخدمات المنتجة جوا حدود الدولة في فترة محددة
خلينا نبدأ في قصة حياة أقتصاد أي بلد
مرحلة التوسع (Expansion)
هنا بتبدأ القصة الاقتصاد بيصحى من نوم ويبدأ يجري. الشركات بتفتح، المصانع تشتغل، والناس بتصرف.
الناتج المحلي الحقيقي " مؤشر غنى الدوله بيزيد"
فيه وظايف أكتر، إنفاق أعلى، واستثمار أكبر
الناس متفائلة، السوق نشيط، والكل بيحس إنه في وقت نشاط
لكن... مع الوقت، النمو بيبدأ يبطأ شوية. مازال إيجابي، بس مش بنفس السرعة. وده بيقربنا من المرحلة الجاية
:المستثمر يعمل ايه في المرحلة دي
ايام الانتعاش الاقتصادي، سوق الأسهم بيبقى شبه مول مفتوح فيه عروض على كل حاجة، والناس بتجري على الشراء
ليه؟ لأن الشركات بترجع تكسب، الأرباح بتزيد، وأسعار الأسهم بتبدأ تطلع وحدة وحدة
فمثلا
مع النمو، الشركات العقارية ترجع تشتغل، مصانع الأسمنت، الحديد تزود انتاج، شركات المقاولات تشتغل – كلها بتتحرك جامد في المرحلة دي. الناس بترجع تشتري هدوم، أدوات منزلية، إلكترونيات ف لو شفت شركة قوية عندها سلاسل محلات أو مبيعات إلكترونية كويسة، دي فرصتك
:وفي نفس الوقت، سوق العقارات بيبقى جاذب جدًا
الأسعار بتبدأ تتحرك لفوق، لكن لسه بدري على الطفرة الكبيرة، فممكن تشتري قبل ما الأسعار تعلى جامد
الطلب على السكن والإيجارات بيرتفع بسبب تحسن دخل الناس
المستثمر العقاري الذكي بيدور في المرحلة دي على مشاريع جذابه أو مناطق لسه في أول صعودها
يعني اللي بيفكر في استثمار طويل المدى، العقار في مرحلة التوسع بيكون فرصة قوية – سواء تشتري عشان تأجر، أو تمسك الأصل وتبيعه بعد ما يعلى السعر
مرحلة القمة (Peak)
في الوقت ده، الاقتصاد بيكون وصل لأحسن حالاته. الناس عندها شغل، المصانع شغالة بكامل طاقتها، الناس بتشتري عربيات، شقق، بتسافر، وبتصرف كتير
بس فيه علامة صغيرة بتقولك إن الدنيا مش هتفضل وردية. رغم إن النمو لسه موجود، بس بيبدأ يبطأ شوية. يعني الشركات لسه بتكسب، بس مش بنفس السرعة. الناس بتصرف بس بمعدل أقل ، في أستثمار بس مش زي الأول.
وفجأة تلاقي الأسعار بقت بتغلى و الطلب أكثر من العرض– ده التضخم. البنك المركزي يبدأ يقلق، ممكن يرفع الفائدة، وده بيبطأ الاقتصاد أكتر.
💡 :نصيحة المستثمر في القمة
خلي عندك حذر. إنت على قمة جبل، وممكن تنزل في أي لحظة. ابعد شوية عن الأسهم اللي فيها مخاطرة عالية، وابدأ وزع فلوسك في حاجات تحافظ على قيمتها وقت التضخم:
زي الذهب، العقار أو صناديق استثمار في أدوات ثابتة وخلّي عينك دايمًا على الأخبار الاقتصادية.
الانكماش أو الركود (Contraction)
الاقتصاد بيتعب، وكأن الشخص اللي كان بيجري في الماراثون تعب. النمو بيقل، الشركات بتقلل الإنتاج، التوظيف بيقل، والمصانع بتقفل. الناس بتقلق، فبيصرفوا أقل، وده بيزود الركود
الأسعار بتقل عشان الناس مش لاقيه حد يشتري. بس مش ده الوقت اللي تقول فيه "يلا أشتري أي حاجة وخلاص". لأ، ده وقت الحذر
💡 :نصيحة المستثمر في الركود
خليك زي الجمل في الصحراء – حافظ على مواردك. ركز على استثمارات آمنة، زي أذون الخزانة أو الذهب أو الصناديق اللي بتدي عائد .خليك متابع السوق كويس، لإن ده برضو الوقت اللي بتكون فيه فرص ممتازة للشراء بأسعار منخفضة، بس لازم تكون واثق في اللي بتشتريه.
القاع (Trough)
بعد فترة من التعب، الاقتصاد بيوصل لأضعف نقطة – القاع ، النقطة اللي من عندها بيبدأ الانطلاق.
النمو بيبدأ يتحول من سالب ل موجب ، البطالة لسه عالية لكن ممكن والشركات مش واثقة تبدأ تستثمر تاني. بس الأرقام الصغيرة بتبدأ تتحرك في الاتجاه الصح:
الإنتاج بيزيد بنسبة صغيرة، الناس بدأت تشتري شوية حاجات بسيطة
في المرحلة دي، التضخم بيكون معتدل أو لسه بيقل، وده مؤشر كويس. لكن التوظيف لسه مش بيزيد بسرعة، لسه الناس متخوفة
💡 :نصيحة المستثمر في القاع
هنا بقى وقت الأبطال اللي بيشوفوا الفرص قبل ما الكل يشوفها. لو لقيت شركات قوية بأسعار أسهم رخيصة، ممكن تشتري وتستنى. بس برضو حافظ على جزء من محفظتك في استثمارات آمنة زي الأذون و الذهب، لإن مفيش ضمان إن السوق هيطلع بسرعة
طالما مفيش ضمان ان الأقتصاد هيطلع تاني، أكيد في مؤشرات ممكن نتابعها تنبهنا احنا داخلين على ايه و أكيد كل مرحلة من حياة الأقتصاد الدولة بتتصرف فيها بشكل معين ( العلاج الكنا بنكلم عنه )، دا الهنكمله في الجاي مع أنواع المنتجات الأستثمارية الممكن ندخل فيها في كل فترة من حياة الأقتصاد