مفتاحك لتحقيق أهداف بُكرة

أخلي فلوسي جنبي؟ ولا أشغلها؟؟ 

هل الناس اللي بتستنى الصدفة تغيّر مستقبلها هيوصلوا؟ أكيد لأ، مستقبلك مش هيجي صدفة، وده بيوصلنا لسؤال و هو

التحويش و الاستثمار رفاهية ولا ضرورة؟ 

كتير من الناس فاكرة إن  تشغيل الفلوس مش حاجة أساسية، وإن مجرد تحويش الفلوس على جنب كفاية علشان نأمّن مستقبلنا. لكن الحقيقة إن التحويش لوحده مش هيعملك حاجة ، لأن ارتفاع الأسعار بيقلل من قيمة الفلوس مع الوقت.  و دا بيوصلنا ل أن  تشغيل الفلوس مش رفاهية، ده أداة قوية هتحقق بيها استقرار مالي وتأمن مستقبلك 

 السؤال اللي بيطرح نفسه: إيه الفرق بين اني أحوش واستثمر؟ وإزاي تعرف أحسن طريقة تدير بيها فلوسك؟ 

يعني إيه تحويشة أو ادخار؟  

: ببساطة هو أنك تخصص جزء من دخلك وتحوشه للمستقبل، وغالبًا بيكون في شكل 

فلوس شايلها في البيت على جنب عشان تغطي المصاريف غير المتوقعة زي تصليح العربية أو الفواتير الكبيرة 

حسابات التوفير سهلة الوصول وبفائدة ثابتة 

الشهادات البنكية  بتوفر عائد مضمون لفترة زمنية محددة. اه شهادات الاستثمار تعتبر أداة ادخار أكتر من كونها أداة استثمار

ايه مميزات التحويش ؟   

لو بتكون تحويشة للطوارئ: المفاجآت بتحصل، وزي ما بيقولوا "الفلوس اللي معاك تحميك"، فوجود مبلغ جاهز لحالات الطوارئ زي مصاريف صحية مفاجئة أو صيانة شئ ضروري

!بس خلي بالك 

فلوسك بتفقد قيمهتا ولو في عائد بيبقى قليل جدًا مقارنة بالاستثمار 

ممكن يكون غير كافي لتحقيق الأهداف الكبيرة زي شراء بيت أو التقاعد المريح 

الاستثمار: إزاي تخلي فلوسك تشتغل؟ 

الاستثمار هو إنك تشغّل فلوسك في أدوات تكبر قيمتها مع الوقت، العائد على الاستثمار بيكون أكبر من الادخار، لكنه بييجي مع مستوى معين من المخاطرة 

لو بتفكر تستثمر، لازم تبقى عارف إن كل نوع من الاستثمار له درجة سيولة 

يعني تقدر تسيل (تحوله كاش)  بسرعة ولا لأ؟ 

:تعالى نشوف سوا  

العقارات  
استثمار طويل ، ممكن يجيب دخل ثابت من الإيجار وكمان يزيد في القيمة مع الوقت
السيولة: ضعيفة – بيع العقار بياخد وقت ومصاريف، مش سهل تخرج منه بسرعة

الذهب  

ملجأ آمن وقت الأزمات، بيحافظ على قيمة فلوسك على المدى الطويل 
السيولة: عالية – تقدر تبيعه بسهولة وقت ما تحتاج كاش 

السندات  
بتديك عائد ثابت ومنخفض المخاطر، خاصة لو كانت حكومية 
السيولة: متوسطة – ممكن تبيعها في السوق عادي 

الأسهم  
لو اشتريت أسهم في شركات ناجحة، ممكن تكسب من الأرباح زيادة السعر 
السيولة: عالية نسبيًا – تقدر تبيعها بسرعة في البورصة، بس السعر ممكن يطلع وينزل

الصناديق الاستثمارية  
بتوفر لك تنويع وتقليل للمخاطر من غير ما تحتاج تدير كل حاجة بنفسك 
السيولة: عاليه في صناديق مفتوحة تقدر تسحب منها بسهولة 

:طب هل ممكن أجمع بين كل الأدوات دي ؟ ممكن طبعا . دي بتكون اسمها محفظة استثمار و دا الهنتكلم عنه في الجاي

امتى يكون الاستثمار هو الخيار الأفضل؟ 

لو عندك أهداف مالية زي شراء بيت، تعليم الأولاد، أو تأمين التقاعد 

لو عايز تحمي فلوسك من زيادة الأسعار وتنمّيها مع الوقت 

لو مستعد لتحمل بعض المخاطر مقابل عوائد أعلى 

 استثمر ولا أحوّش؟ 

الخلاصة بُكره هتقولهالك 

 إمتى أحوش و إمتى استثمر ؟ 

ببساطة، التحويش هو خط الدفاع الأول! يعني لو لسه ما عندكش تحويشة للطوارئ تكفيك من 3 لـ 6 شهور مصاريف، يبقى الأولوية دلوقتي هي الادخار. لازم يكون عندك مبلغ جاهز لأي ظرف مفاجئ - مرض، تصليح، أو مصاريف مستعجلة. بس برضو الفلوس البتحوشها لازم تكون بتحافظ على قيمتها

الادخار والاستثمار مش ضد بعض، بالعكس، الأفضل هو التوازن بينهم  

يعني نعمل ايه؟ 

يعني خلي عندك تحويشة للطوارئ علشان أي ظرف مفاجئ

استثمر جزء من فلوسك في أدوات مالية تناسب أهدافك 

ابدأ حتى لو بمبلغ بسيط، لأن المهم إنك تاخد الخطوة الأولى

:في الجاي هنبدأ نكلم عن أدوات الأستثمار و نجاوب على أسئلة مهمة زي 

هل الذهب والعقارات استثمارات آمنة فعلًا؟ 

إيه موضوع الصناديق الاستثمارية، وهل هي مناسبة للمبتدئين؟ 

إيه الفرق بين الأسهم والسندات  و الصكوك؟ 

ازاي أقدر أوزع استثماراتي بطريقة صح؟