!لعبة اليويو: اتفاق مؤقت بين أمريكا والصين يقلب الأسواق فوق تحت

في لحظة، ومن غير مقدمات، الأسواق العالمية قلبت تمامًا!
أمريكا والصين أعلنوا عن اتفاق مؤقت لتخفيض الرسوم الجمركية بين بعض لمدة 90 يوم بس... بس ده كان كفاية علشان الدنيا كلها تتغير.

·      الذهب : اللي كان نجم الأمان في الشهور اللي فاتت – فجأة خسر 3% ونزل لأقل مستوى ليه من أكتر من أسبوع. الناس بدأت تبيع وتدور على فرص تانية، وده طبيعي لما التفاؤل يرجع للأسواق.

·      في المقابل، أسعار النفط طارت حوالي 4%:
ليه؟ لأن الاتفاق قلل التوتر بين أكبر دولتين بيستهلكوا نفط في العالم، فبقى في أمل إن النمو الاقتصادي يرجع، وبالتالي الطلب على الطاقة يزيد.

·      وحتى البورصات العالمية احتفلت: الأسهم الأمريكية والأوروبية طلعت بشكل واضح، وشركات الشحن الكبيرة كسبوا جامد.

بس في شوية حقائق لازم ناخد بالنا منها:

·      الاتفاق ده هش ومؤقت، مش نهاية الحرب التجارية. الرسوم الجمركية لسه موجودة (30% من أمريكا، و10% من الصين)، والاتفاق نفسه مدته 3 شهور بس – يعني مجرد هدنة خفيفة في حرب معقدة.

·      المحللين شايفين إن اللي حصل ده بداية طريق مفاوضات طويلة، ولسه قدامنا كتير. كل شوية هنسمع خبر يرفع السوق، وبعدها بيومين خبر تاني ينزل كل حاجة… وده اللي ناس كتير بدأت تسميه "لعبة اليويو"!.

السؤال هو : هل البيحصل ده  لو استمر ممكن يخلي الأسواق تفقد استجابتها لأي حاجة بتحصل في العالم ؟