عودة الغاز وثقة الخليج… بس السوق لسه بيرتب أوراقه
الغاز راجع تاني لمصر... خطوة لتخفيف الأزمة؟
بدأت إسرائيل ترجع تضخ الغاز الطبيعي لمصر بشكل تدريجي، بعد توقف استمر 5 أيام. الكميات اللي بتوصل حاليًا حوالي 80 مليون قدم مكعب يوميًا، والمسؤولين في الحكومة قالوا لـ"الشرق" إنهم متوقعين توصل الكمية لـ650 مليون قدم مكعب
وده في مقابل الكمية اللي كانت مصر بتستوردها قبل الحرب، واللي كانت حوالي مليار قدم مكعب يوميًا
إيه اللي حصل؟
الموضوع بدأ لما إسرائيل وقفت الإنتاج في أكبر حقل غاز عندها، "ليفياثان"، يوم الجمعة اللي فاتت، بعد ما شنت غارات جوية على إيران
وده أثر بشكل مباشر على مصر اللي بتعتمد بشكل كبير على الغاز المستورد من إسرائيل، واضطرت الحكومة تقلل ضخ الغاز لبعض المصانع
وزير الطاقة الإسرائيلي، إيلي كوهين، صرّح إن بلاده ممكن تستأنف تصدير الغاز بشكل أوسع لمصر ، وده ممكن يساعد في تقليل الضغط اللي بتواجهه مصر بسبب الأزمة
عودة الغاز حتى لو بكميات أقل، ممكن تكون بداية لتخفيف الضغط عن القطاعات المتأثرة، خصوصًا مع دخول الصيف وزيادة الطلب على الكهرباء
الخليج بيجدد ثقته في الاقتصاد المصري
قطر داخلة بقوة في السوق المصري
قطر ناوية تضخ 3.5 مليار دولار في مشروع سياحي كبير على ساحل البحر المتوسط في مصر
المفاوضات دلوقتي في مراحلها الأخيرة، ولو كل حاجة مشيت تمام، الصفقة دي هتبقى واحدة من أكبر الاستثمارات الخليجية في مصر الفترة دي
ودي مش أول مرة نشوف دعم زي ده… الإمارات قبل كده دخلت بـ35 مليار دولار في مشروع رأس الحكمة، والنتيجة كانت ضخ سيولة كبيرة ساعدت الاقتصاد يقف على رجليه
وكمان الكويت في الصورة
الكويت بتخطط لاستثمار حوالي 4 مليارات دولار من ودائعها في مصر
بس الفرق هنا إن قطر هتضخ سيولة جديدة تمامًا، مش تحويل ودائع… وده بيدي قوة أكبر للاقتصاد لأنه بيأثر مباشرة على السوق والعملة
ومصر مستعدة
السلطات في مصر كانت وضّحت قبل كده إنها ناوية تكرر تجربة الإمارات في مشاريع الساحل، وبتجهز أراضي كبيرة لمشروعات سياحية واستثمارية جديدة.
إشارات مهمة
الاستثمارات الخليجية مش بس بتضخ فلوس، دي كمان بتدي ثقة عالمية إن "السوق المصري بيرجع بقوة على الخريطة
السوق مش مستقر ، والذهب مستنى يشوف إيه اللي هيحصل
أسعار الذهب الأيام دي مش ثابتة وبتتلخبط كل شوية… ليه؟
من ناحية، في توتر كبير في الشرق الأوسط، والضغط بيزيد على إيران من أمريكا وإسرائيل… وفي كلام إن أمريكا ممكن تدخل في الصورة بنفسها! ومن الناحية التانية، الاقتصاد الأمريكي مش في أحسن حالاته – بيانات مبيعات التجزئة والإنتاج والإسكان طلعت ضعيفة جدًا
الغريب في الموضوع إن رغم كل ده، الذهب مش بيطير قوي زي ما ناس كتير كانت متوقعة
الذهب زاد 4% الأسبوع اللي فات لما إسرائيل بدأت تضرب في البرنامج النووي الإيراني… بس بعدها رجع يهدى، حتى مع استمرار التوترات
وده مش غريب حسب الناس اللي بتفهم في السوق… لأن التاريخ بيقول إن الذهب بيتفاعل بسرعة مع الأزمات، بس مش بيكمل طلوع لفترة طويلة بعد كده
الأسعار حاليًا لسه أقل من أعلى رقم حققه في أبريل، لكن برضو الذهب ماشي في طريقه يكمّل الشهر السادس على التوالي بمكاسب
الذهب يعتبر واقف على الحياد… مش عارف يتحرك شمال ولا يمين، مستني اللي جاي